Fréttir & tilkynningar

Haldið verður upp á sumardaginn fyrsta í Kópavogi með skemmtilegri dagskrá nú sem endranær. Dagskráin hefst með helgistund skátanna í Hjallakirkju klukkan ellefu. Klukkan 13.30 verður haldið í skrúðgöngu frá Digraneskirkju í Fífuna. Frá 14.00 til 16.00 verður fjölskylduskemmtun í Fífunni. Þar verða hoppukastalar og boðið upp á fjölbreytt skemmtiatriði, leikhópinn Lottu, tónlistaratriði og dans. Það er skátahreyfingin og Kópavogsbær sem standa að hátíðarhöldunum.

Vorhreinsun í Kópavogi hefst mánudaginn 20. apríl og stendur til 6. maí. Bæjarbúar eru hvattir til að hreinsa lóðir sínar en starfsmenn Kópavogsbæjar fjarlægja garðaúrgang sem fólk hefur sett utan við lóðamörk sín á tímabilinu 20. apríl til 6. maí. Þessi þjónusta er veitt í íbúðahverfum bæjarins. Byrjað verður í Vestur- og Austurbæ, þá haldið í Smára-, Linda- og Salahverfi og loks haldið í Kóra- og Vatnsendahverfi. Bærinn hvetur auk þess fyrirtæki til þess að taka til á sínum lóðum og vera samtaka bæjarbúum í að fegra nærumhverfi sitt.

Kópavogsbúum býðst að fá tónlistarfólk heim í stofu föstudaginn 8. og laugardaginn 9. maí. Stofutónleikarnir eru hluti af hátíðarhöldum í tilefni 60 ára afmælis bæjarins en lista- og menningarráð Kópavogs býður bæjarbúum upp á stutta og stórskemmtilega tónleika afmælishelgina. Þeir listamenn sem halda munu stofutónleika eru Björn Thoroddsen, Bee Bee (Brynhildur Oddsdóttir), Snorri Helga og KK, Kristján Kristjánsson. Tónleikarnir eru húsráðanda að kostnaðarlausu en sækja þarf um að fá að halda tónleika.

Útskriftarhátíð Listaháskóla Íslands fer að hluta til fram í menningarhúsum Kópavogs, Gerðarsafni og Salnum í apríl og maí. Útskriftarsýning meistaranema í hönnun og myndlist fer fram í Gerðarsafni og átta útskriftartónleikar nema úr tónlistardeild skólans fara fram í Salnum. Ókeypis er inn á alla þessa viðburði. Sýningin í Gerðarsafni verður opnuð laugardaginn 18. apríl og stendur yfir til 10. maí og fyrstu útskriftartónleikarnir í Salnum fara fram 24. apríl en þeir síðustu 12. maí.

Menningarstyrkir í Kópavogi voru afhentir við hátíðlega athöfn í Salnum í hádeginu í dag. Alls 20 aðilar, einstaklingar, hópar, hátíðir eða samtök fá styrk úr lista- og menningarsjóði í ár. Upphæðin nemur um 14,5 milljónum króna. Verkefnin sem hljóta styrk eru fjölbreytt að venju og má meðal annars nefna nýja lista- og tónlistarhátíð Cycle sem fram fer í Salnum, Gerðarsafni og víðar í Kópavogi í ágúst, útitónleika í Hamraborg undir stjórn Erps Eyvindarsonar, Tónlistarhátíð unga fólksins, sérviðburði á Riff kvikmyndahátíð og barnamenningarhátíð í lok maí svo fátt eitt sé nefnt. Kórar í Kópavogi fá einnig rekstrarstyrk sem og Sögufélag Kópavogs og Ritlistarhópur Kópavogs.

Kópavogsbúum og öllum velunnurum bæjarins er boðið á stórtónleika í Kórnum í Kópavogi sunnudaginn 10. maí í tilefni sextugsafmælis bæjarins. Á tónleikunum koma fram 600 manns sem allir eiga það sameiginlegt að vera Kópavogsbúar eða eiga rætur sínar að rekja í Kópavog.

Nemendur í Vatnsendaskóla afhentu nýverið fulltrúum Rauða krossins, Samhjálpar, Unicef og ABC-barnahjálp afrakstur söfnunar góðgerðaviku skólans, alls ríflega 300.000 krónur. Í góðgerðavikunni var hefðbundin kennsla brotin upp og nemendur fræddust á fjölbreyttan hátt um störf þessara hjálparsamtaka. Þeir fóru meðal annars í vettvangsheimsóknir í nytjamarkaðinn og Samhjálp og elsta stigið kynnti sér stöðu flóttamanna.

Aníta Daðadóttir, Salaskóla, bar sigur úr bítum í árlegri upplestrarkeppni sjöunda bekkjar í Kópavogi. Átján keppendur úr öllum níu grunnskólum Kópavogs tóku þátt í keppninni, sem fór fram í Salnum 25. mars síðastliðinn. Í öðru sæti var Björn Breki Steingrímsson, Salaskóla og í þriðja sæti var Bjartur Jörfi Ingvason, Snælandsskóla.

Grunnskólar í Kópavogi voru yfir landsmeðaltali í öllum greinum í samræmdu prófunum sem þreytt voru síðastliðið haust. Þetta kemur fram í skýrslu um samræmd könnunarpróf 2014. Prófað var í þremur greinum í 10. bekk, íslensku, stærðfræði og ensku, og tveimur í sjöunda og fjórða bekk, íslensku og stærðfræði. Í öllum þessum greinum er Kópavogur yfir landsmeðaltalinu, sem er 30 á normaldreifðum kvarða.

Horfur í Kópavogi uppfærast úr stöðugum í jákvæðar í nýju lánshæfismati Reitunar (PDF skjal). Lánshæfi Kópavogs helst óbreytt en Reitun spáir hækkun á lánshæfismati í kjölfar ársuppgjörs bæjarfélagsins, ef ekkert óvænt kemur fram.