Aníta vann upplestrarkeppnina

27.03.2015
Sigurvegari í upplestrarkeppni 7. bekkjar 2015 var Aníta Daðadóttir, í öðru sæti var Björn Breki St…
Sigurvegari í upplestrarkeppni 7. bekkjar 2015 var Aníta Daðadóttir, í öðru sæti var Björn Breki Steingrímsson og í þriðja sæti Bjartur Jörfi Ingvason. Þau eru hér ásamt Þóru Ragnarsdóttur kennara sem var kynnir keppninnar.

Aníta Daðadóttir, Salaskóla, bar sigur úr bítum í árlegri upplestrarkeppni sjöunda bekkjar í Kópavogi. Átján keppendur úr öllum níu grunnskólum Kópavogs tóku þátt í keppninni, sem fór fram í Salnum 25. mars síðastliðinn. Í öðru sæti var Björn Breki Steingrímsson, Salaskóla og í þriðja sæti var Bjartur Jörfi Ingvason, Snælandsskóla. 

Keppendur lásu kafla úr sögunni Öðruvísi fjölskylda eftir Guðrúnu Helgadóttur og ljóð eftir Anton Helga Jónsson. Í lokaumferð lásu keppendur ljóð að eigin vali. Fyrir keppnina lék nemandi úr Skólahljómsveit Kópavogs tvö lög og í hléi lék nemandi úr Tónlistarskóla Kópavogs einnig tvö lög.

Þrír efstu keppendurnir fengu 20, 15 og 10 þúsund króna gjafabréf og Félag íslenskra bókaútgefenda gaf öllum þátttakendum bókina Nokkur Ljóð eftir Anton Helga Jónsson. Grunnskóladeild Menntasviðs gaf öllum keppendunum blóm.

Aftur í yfirlit