Stuðningur við börn og fjölskyldur þeirra

• Foreldrafræðslu og uppeldisráðgjöf á vegum Áttunnar uppeldisráðgjafar og/eða stuðningi í formi stuðningsaðila fyrir foreldra. Markmið stuðnings er að aðstoða og leiðbeina foreldrum, forsjáraðilum eða vistunaraðilum við að tryggja þroskavænleg uppeldisskilyrði og aðbúnað barna. Stuðningur er veittur innan sem utan heimilis, s.s. með skipulag heimilishalds og ráðgjöf. Allur stuðningur miðar að því að mæta mismunandi þörfum foreldra og að því að valdefla þá í hlutverki sínu.
• Einstaklingsstuðningi sem kallaðist áður félagsleg liðveisla og er fyrir börn á aldrinum 6 til 18 ára. Stuðningsaðili vinnur með barni innan sem utan heimilis með það að markmiði að rjúfa félagslega einangrun, efla lífsleikni, samfélagsþátttöku og efla börn til aukinnar sjálfshjálpar.
• Stuðningsfjölskyldum fyrir börn á aldrinum 0 til18 ára. Markmið með stuðningsfjölskyldu er að styðja foreldra, forsjáraðila eða vistunaraðila í uppeldishlutverki sínu, veita þeim hvíld og/eða styrkja stuðningsnet barns eftir því sem við á og auka möguleika barnsins á félagslegri þátttöku.
• Skammtímadvöl fyrir fötluð börn á aldrinum 6 til 18 ára. Markmið með skammtímadvöl er að gefa börnum kost á að dvelja tímabundið utan heimilis síns þegar um er að ræða miklar stuðningsþarfir umfram jafnaldra og til að styðja við fjölskyldu barnsins.

Til að eiga rétt á stuðningi þurfa foreldrar, forsjáraðilar og börn að uppfylla eftirfarandi skilyrði: 

• Eiga lögheimili í Kópavogi.
• Vera metin í þörf fyrir stuðning samkvæmt reglum um stuðning við börn og fjölskyldur þeirra. 
• Forsjáraðilar skulu hafa forsjá með þeim börnum sem stuðningur snýr að. 

Fjölskyldur með lögheimili utan Kópavogs geta sótt um stuðning fyrir börn og fjölskyldur ef þörf fyrir stuðning tengist fötlun innan fjölskyldunnar en skilyrði er að umsækjendur skrái lögheimili sitt í Kópavogi þegar stuðningur hefst.

Fyrsta skref foreldra og forsjáraðila er að panta viðtal við ráðgjafa á velferðarsviði Kópavogs í síma 441-0000. Í framhaldinu er tekin sameiginleg ákvörðun um hvaða stuðningur hentar fjölskyldunni og umsókn undirrituð ef við á. Einnig má hafa samband við tengilið farsældar í nærumhverfi en þeir eru staðssettir í leik- og grunnskólum Kópavogs. Sjá nánar á farsældarsíðu Kópavogs. Einnig má fylla út umsókn inn á þjónustugátt og ráðgjafi hefur samband.

Þegar undirrituð umsókn um stuðning liggur fyrir er næsta skref formlegt mat á stuðningsþörf fjölskyldunnar. Matið tekur mið af stöðu fjölskyldunnar með tilliti til eftirfarandi þátta: 

• Færni, geta og styrkleikar 
• Félagslegar aðstæður og tengslanet 
• Virkni og þátttaka í samfélaginu 
• Hvaða afleiðingar seinkun á stuðningi hefur fyrir fjölskylduna 
• Annar stuðningur 

Við formlegt mat á stuðningsþörf er litið til heildaraðstæðna fjölskyldunnar. Ef matið leiðir í ljós að ekki er talin þörf á stuðningi er umsókn synjað. Sé umsókn samþykkt vinnur ráðgjafi stuðningsáætlun í samvinnu við fjölskylduna. 

Stuðningsáætlun byggir á formlegu mati á stuðningsþörf. Í áætluninni er eftirfarandi spurningum svarað:  

• Hvaða stuðningur er veittur? 
• Hver eru markmiðin? 
• Hvernig er árangur metinn? 
• Hvernig er stuðningi háttað?

Stuðningur við börn og fjölskyldur er veittur á grundvelli eftirfarandi laga og reglna: 

1. Reglur Kópavogsbæjar um stuðning við börn og fjölskyldur þeirra  
2. Lög um félagsþjónustu sveitarfélaga, nr. 40/1991 
3. Lög um þjónustu við fatlað fólk með langvarandi stuðningsþarfir, nr. 38/2018 
4. Barnaverndarlög nr. 80/2002.

Allar umsóknir og úttektir stuðningsfjölskyldna fara fram hjá Gæða og eftirlitsstofnun, hvort sem um er að ræða barnaverndar – eða í málefni fatlaðra barna. Það sama á við um endurnýjanir umsókna. Umsóknir og endurnýjun umsókna eru unnar eingöngu rafrænt.

Umsækjendur fara inn á Gæða- og eftirlitsstofnun velferðarmála í gegnum mínar síður og með rafrænum skilríkjum.

Efst í hægra horni eru: umsóknir og þaðan er leitað eftir eyðublaði: Umsókn um leyfi til að vera stuðningsfjölskylda fyrir barn.

Fylgiskjöl með umsókn eru þau sömu og áður

• Samþykki fyrir öflun sakavottorðs (og þar má finna eyðublað vegna sakavottorðs)
• Heilbrigðisvottorð umsækjanda (sótt er um í gegnum Heilsuvera.is)

Umsókn berst Gæða og eftirlitstofnun og er síðan send velferðarráði hvers sveitarfélags til úttektar.

Leyfisveiting verður síðan út frá Gæða og eftirlitsstofnun.