Góður rekstur leggur grunn að lægri sköttum

Fjárhagsáætlun Kópavogsbæjar fyrir árið 2025 var lögð fram til fyrri umræðu í bæjarstjórn í dag, þriðjudaginn 13. nóvember.

Lykilatriði

• Gert er ráð fyrir 159 milljón króna jákvæðri niðurstöðu A- og B-hluta
• Ekki er gert ráð fyrir sölu byggingarréttar í áætlun bæjarins en áfram verður úthlutað í Vatnsendahvarfi og öðrum hverfum bæjarins.
• Veltufé frá rekstri er 5 milljarða króna
• Fasteignaskattar lækka áfram og verða með þeim lægstu á landsvísu
• Skuldaviðmið verður 92,2%
• Forgangsraðað er í þágu grunnþjónustu í mennta- og velferðarmálum
• Kársnesskóli Skólagerði tekinn í notkun haustið 2025
• Leikskólar byggðir samfara fjölgun íbúa
• Nýtt sambýli í Kleifakór tekið í notkun
• Nýtt hjúkrunarheimili Boðaþingi tekið í notkun

„Rekstur Kópavogsbæjar felur í sér ábyrgan rekstur þar sem skuldahlutföll eru lág, fjárfest er í innviðum fyrir framtíð bæjarins og þjónusta við bæjarbúa er sett í forgang. Áfram er áhersla lögð á að lækka fasteignaskatta á heimilin en þeir eru meðal þeirra lægstu á landsvísu í Kópavogi. Fjármagni verður forgangsraðað í grunnþjónustu og viðbótarfjármagn veitt í velferðar- og menntamál. Sterkur rekstur skapar rými til áframhaldandi uppbyggingar í bæjarfélaginu. Nýr Kársnesskóli mun rísa á árinu, leikskólar verða byggðir til að mæta væntri fjölgun og sambýli rísa. Þá eru áform um frekari uppbyggingu íþróttamannvirkja. Áfram verður gætt aðhalds í rekstri og staðið vörð um ábyrgan rekstur. Á árinu verða markviss skref stigin við innleiðingu á gervigreind sem mun skila sér í aukinni skilvirkni, bættri ákvörðunartöku og þjónustu við bæjarbúa,“ segir Ásdís Kristjánsdóttir bæjarstjóri Kópavogs.

Jákvæður rekstur

Gert er ráð fyrir að rekstrarniðurstaða samstæðunnar verði jákvæð sem nemur 159 milljónum og að niðurstaða A-hluta verði jákvæð um 213 milljónir. Mikilvægt er að vekja athygli á því að í fjárhagsáætlun Kópavogsbæjar er ekki gert ráð fyrir sölu byggingarréttar, þó áform erum um að lóðum verði úthlutað í Vatnsendahvarfi og öðrum svæði á næsta ári með tilheyrandi tekjum. Veltufé frá rekstri er áætlað 5 milljarðar króna á samstæðu bæjarins sem endurspeglar það svigrúm sem reksturinn er að gefa til að standa undir framkvæmum og afborgunum lána. Skuldir eru hóflegar þrátt fyrir miklar framkvæmdir og skuldaviðmið 92,2% samkvæmt áætlun, sem er langt undir lögbundnu viðmiði.

Fjárhagsáætlun sýnir að fjárhagur bæjarins er mjög traustur. Áfram verður áhersla á að skapa rými til þess að forgangsraða í þágu grunnþjónustu í mennta- og velferðarmálum. Íbúar Kópavogs verða 41.400 í árslok árinu 2025 og fjölgar um 2%.

Fasteignaskattar lækka áfram

Spár greiningaraðila gera ráð fyrir að verðbólgan lækki og verði um 4% á árinu. Efnahagsumhverfi hefur verið krefjandi undanfarin ár en horfur eru betri á næsta ári.

Tólfta árið í röð lækka fasteignaskattar á íbúðarhúsnæði og þá lækka einnig fasteignaskattar á atvinnuhúsnæði. Fasteignaskattar á heimili eru með þeim lægstu á landsvísu og fasteignagjöld hafa ekki hækkað að raunvirði undanfarin ár. Útsvarsprósentan helst óbreytt.

Sem fyrr er eldri borgurum og örorkulífsiðeyrisþegum veittur afsláttur af fasteignasköttum í hlutfalli við tekjur.

Gjaldskrár taka mið af uppreiknaðri vísitölu samkvæmt vísitölum Hagstofu Íslands í hlutfalli við vægi einstakra kostnaðarliða í rekstri. Þær eru endurskoðaðar að jafnaði tvisvar til fjórum sinnum á ári en þetta fyrirkomulag var tekið upp árið 2023.

Velferð og menntun í barnvænu sveitarfélagi

Á árinu 2025 verður rík áhersla á málefni leik- og grunnskóla og á að halda úti góðri velferðarþjónustu. Kópavogur er barnvænt sveitarfélag og verkefni sveitarfélagsins taka mið af því.

Lögð verður áhersla á að samstarf í kringum börn og fjölskyldur sé í skýrum farvegi og að barnið sé hjartað í kerfinu með áframhaldandi þátttöku í innleiðingu farsældarlaga.

Aukið framlag verður sett í kennslu íslensku til barna af erlendum uppruna. Þá verður sett aukið fé til að efla bókasöfn skólanna.

Breytingar á starfsumhverfi leikskóla sem tóku gildi 2023 hafa heppnast vel. Skapast hefur fjárhagslegt svigrúm með breytingunum til þess að styrkja starfsemi leikskólanna enn frekar árið 2025.

Boðið verður upp á helgaropnun í félagsmiðstöðvum eldra fólks með það að markmiði að draga úr einmanaleika og einangrun.

Fjárfest í framtíð bæjarins

Umfangsmiklar framkvæmdir á vegum bæjarins eru áætlaðar á næsta ári fyrir um sex og hálfan milljarða króna og áfram tryggt að innviðir mæti þörfum bæjarbúa og viðhaldi eigna sé vel sinnt.

Stærstu framkvæmdir eru bygging nýs skóla á Kársnesi sem lýkur á næsta ári. Þá hefjast framkvæmdir við nýjan leikskóla við Skólatröð. Hafinn verður undirbúningur á nýjum leikskóla við Naustavör og leik-og grunnskóla í nýju hverfi við Vatnsendahvarf. Þá verða skóla og leikskólalóðir endurnýjaðar samkvæmt áætlun.

Lokið verður við nýtt búsetuúrræði í Kleifakór. Stækkun hjúkrunarheimilis í Boðaþingi heldur áfram og er gert ráð fyrir að framkvæmdum ljúki 2025. Kópavogsbær greiðir 15% kostnaðar í hjúkrunarheimili.

Þá hefjast framkvæmdir við aðalvöll HK og nýja stúku en 800 milljónir verða settar í verkið á næsta ári.

Áfram verður fjármagn sett í aukið viðhald á stofnunum bæjarins. Þá er gatnagerð í nýju hverfi í Vatnsendahvarfi hafin og verður haldið áfram 2025. Alls verður um 2,4 milljörðum króna verður varið í gatnagerð, veitur og skipulagsmál.

Skilvirkari stjórnsýsla

Á næsta ári ætlar Kópavogsbær að stíga markviss skref í innleiðingu á gervigreind með það að markmiði að auka skilvirkni í stjórnsýslunni, bæta ákvörðunartöku og þjónustu við bæjarbúa.

Áfram er áhersla á menningarmál í Kópavogi. Meðal þess sem fjárfest verður í á næsta ári er nýr flygill fyrir Salinn. Ný Menningarmiðja var opnuð í maí 2024 á Bókasafni Kópavogs og Náttúrufræðistofu og hefur aðsókn á safnið rúmlega fimmfaldast frá þeim tíma. Áfram verður unnið að frekari þróun á safninu. Þá verður hugað að hönnun á nýju bókasafni í efri byggðum Kópavogs.

Útisvæðið við menningarhúsin verður bætt með gróðursetningu og leiktækjum auk þess sem mannlíf á Hálsatorgi og í Menningarmiðjunni verður eflt með fjölbreyttum viðburðum allt árið um kring.

Með fjárhagsáætlun 2025 er einnig lögð fram þriggja ára áætlun áranna 2026, 2027 og 2028 til fyrri umræðu.

Fjárhagsáætlun 2025

Þriggja ára áætlun 2026, 2027, 2028

Kynning