Starfshópur um málefni Salarins

Nýskipaður starfshópur um málefni Salarins, tónlistarhúss í Kópavogi, hefur tekið til starfa. Í starfshópnum sitja Védís Hervör Árnadóttir, forstöðumaður miðlunarsviðs Samtaka atvinnulífsins og tónlistarmaður, Halldór Friðrik Þorsteinsson og Davíð Þór Jónsson tónlistarmaður. Védís Hervör er formaður hópsins en starfsmaður hans er Soffía Karlsdóttir, forstöðumaður menningarmála í Kópavogi.

• Védís Hervör á langan tónlistarferil að baki og lærði upptökustjórn og hljóðblöndun í London. Védís er með BA í mannfræði og atferlishagfræði með meistaragráðu i rekstri og stjornun (MBA). Védís er einn stofnenda KÍTÓN, félags kvenna í tónlist og varaformaður Félags tónskálda og textahöfunda sem á sæti í stjórn STEFs ásamt Tónskáldafélagi Íslands (TÍ) en hún situr einnig í stjórn Borgarleikhússins. Védís er í dag forstöðumaður miðlunarsviðs SA.
• Halldór Friðrik er fyrrum verðbréfamiðlari. Hann er með cand. oecon og BA í heimspeki frá Háskóla Íslands. Hann starfaði á fjármálamarkaði um árabil, stofnaði H.F. Verðbréf 2004 og Kelduna 2009. Halldór stofnaði ásamt fleirum Alfreð atvinnumiðlun árið 2013. Hann sat í stjórn Vinafélags Íslensku óperunnar 1994-1997.
• Davíð Þór er meðal fremstu og fjölhæfustu tónlistarmanna landsins, jafnvígur á píanóleik, spuna, tónsmíðar og hljómsveitarstjórn auk þess sem hann leikur á ógrynni hljóðfæra. Hann hefur leikið á tónlistarhátíðum víða um heim, gert tónlist og hljóðmyndir fyrir fjölda verka. Davíð Þór hefur hlotið Íslensku tónlistarverðlaunin og Grímuverðlaunin sem og alþjóðleg verðlaun fyrir kvikmyndatónlistina úr Hross í oss og Kona fer í stríð. Davíð Þór var staðarlistamaður Salarins 2023 og hélt þrenna spunatónleika af því tilefni.

,,Það er mikilvægt að fá blöndu af fólki með reynslu úr tónlistarheiminum á Íslandi ásamt rekstrarkunnáttu í óháða rekstrarúttekt á starfsemi Salarins. Við erum þakklát þeim að taka þessa tímabundnu úttekt að sér sem hefur það að markmiði að leggja fram tillögur fyrir gróskumikið starf í Salnum, eina af perlum bæjarins sem glæðir tónlistarmenningu Kópavogs og landsins alls lífi. Það var mat okkar að hér færi öflugur hópur fólks sem gæti fært okkur ólíka og sterka sýn á málefni Salarins - laus við pólitík og þras,” segir Ásdís Kristjánsdóttir, bæjarstjóri Kópavogs.

Starfshópurinn hefur það hlutverk að gera úttekt á starfsemi Salarins með það að markmiði að fjölga viðburðum og komu gesta í Salinn. Meðal verkefna hópsins er að skilgreina áherslur í tónleikahaldi og koma með tillögur að tekjuöflunarmöguleikum. Þá mun hópurinn kalla eftir hugmyndum starfsfólks og sérfræðinga í sinni vinnu. Niðurstöðustöðurnar verða kynntar lista- og menningarráði og athugasemdir ráðsins teknar til umfjöllunar áður en lokaskýrslu er skilað.

Starfshópurinn, sem er skipaður af bæjarstjóra Kópavogs, skilar skýrslu og fullbúnum tillögum til bæjarstjóra fyrir 1. júlí 2024.