Smábátahöfnin í Kópavogi fékk Bláfánann

Ármann Kr. Ólafsson bæjarstjóri tók á  móti Bláfánanum í fallegu veðri við smábátahöfn Kópavogs í gær þar sem Siglingafélagið Ýmir hefur aðsetur. Fáninn er alþjóðleg umverfisviðurkenning fyrir smábátahafnir og baðstrendur. Þær hafnir sem skarta Bláfánanum leggja áherslu á hreint umhverfi og fræðslu í þeim efnum, flokkun sorps, og öryggi.

Við sömu athöfn var vígt nýtt fróðleiksskilti með helstu upplýsingum um Bláfánaverkefnið, öryggi við höfnina, umgengnisreglur og umhverfi hafnarinnar.

Fáninn mun blakta við höfnina í Kópavogi fram til 15. september. Sex aðrar hafnir á Íslandi fengu Bláfánann í ár, en þær eru í Stykkishólmi, Borgarfirði eystri, Patreksfirði, við Bláa lónið, Ylströndina í Reykjavík og við Langasand.

 

Markvisst hefur verið unnið að því frá byrjun þessa árs að fá Bláfánann hingað í Kópavog, en þar hafa lagt lóð á vogarskálarnar umhverfis- og samgöngunefnd, starfsmenn umhverfissviðs, hafnarvörður og Siglingafélagið Ýmir.

 

Bláfáninn er mikil viðurkenning fyrir Kópavogsbæ. Bærinn mun í samstarfi við siglingafélagið standa að umhverfisfræðslu fyrir starfsmenn Kópaness og félagsmenn Ýmis. Þau börn sem verða á siglinganámskeiði í sumar hjá Kópanesi verða einnig frædd um umhverfismál, flokkun á sorpi og mikilvægi öryggis í kringum siglingar.