Hrafnista tekur við rekstri Boðans

Kópavogsbær hefur samið við Hrafnistu um rekstur félagsmiðstöðvarinnar Boðanum í Boðaþingi. Haldið var upp á áfangann með veislu í Boðaþingi þar sem fastagestir fjölmenntu.

Ásdís Kristjánsdóttir bæjarstjóri Kópavogs og Aríel Pétursson formaður Sjómannadagsráðs sem rekur Hrafnistu héldu stutt ávörp við tækifærið og heilsuðu upp á gesti í Boðaþingi. Sóli Hólm flutti gamanmál og svo var boðið upp á veitingar.

Hrafnista hefur rekið 44 rýma hjúkrunarheimili í Boðaþingi og 30 rýma dagdvöl fyrir aldraða frá árinu 2010. Í dag standa einnig yfir framkvæmdir vegna 64 nýrra hjúkrunarrýma í Boðaþingi sem verða tilbúin í maí 2025 auk þess sem Sjómannadagsráð á og rekur 95 leiguíbúðir í Boðaþingi í gegnum leigufélagið Naustavör.

Með samningnum færist Hrafnista Boðaþingi nær því að setja upp lífsgæðakjarna sem eru sambærilegir við þá sem starfræktir eru í Hafnarfirði, Reykjavík og Reykjanesbæ.

Takmarkið er að lífsgæðakjarninn verði að akkeri í hverfinu, þangað sem eldra fólk getur sótt sér þjónustu, félagsskap og afþreyingu af ýmsu tagi. Húsið verður áfram opið öllum og í boði fjölbreytt dagskrá og viðburðir þar sem leitast er eftir því að sníða starfið að áhugasviði sem flestra eins og hefur verið gert undanfarin ár í félagsmiðstöðinni Boðanum.