Sundlaugar loka í hertu samkomubanni

Samkomubann með hertum takmörkunum tekur gildi 24.mars og gildir til 12. apríl. Sundlaugar og íþróttamiðstöðvar munu loka í hertu samkomubanni en skólar starfa áfram með þeim takmörkunum sem áður hafa verið kynntar.

Heilbrigðisráðherra hefur ákveðið í samræmi við tillögu sóttvarnalæknis, að takmarka samkomur enn frekar en áður vegna hraðari útbreiðslu Covid-19 í samfélaginu.  Viðburðir þar sem fólk kemur saman verða takmarkaðir við 20 manns í stað 100 áður.  Hvar sem fólk kemur saman og í allri starfsemi skal tryggt að hægt sé að hafa að minnsta kosti 2 metra á milli einstaklinga.

Þessi fyrirmæli hafa áhrif á þjónustu sveitarfélaga:

• Öllum sundlaugum, íþróttamiðstöðvum, söfnum og bókasöfnum á höfuðborgarsvæðinu verður lokað frá miðnætti 23. mars.
• Skólar og leikskólar verða áfram opnir en þeir foreldrar eða forráðamenn sem af einhverjum ástæðum senda ekki börn sín í skólann þurfa að tilkynna það líkt og um skólaleyfi væri að ræða og taka um leið yfir ábyrgð á heimanámi barna sinna.
• Önnur þjónusta sveitarfélaganna mun áfram haldast órofin eins og kostur er.

Í Kópavogi hefur aðgengi að Bæjarskrifstofum Kópavogs verið lokað fyrir utanaðkomandi að langmestu, aðgengi að bygginu velferðarsviðs, Fannborg 6, er heimilt með takmörkunum. Markmiðið er að tryggja órofa starfsemi sveitarfélagsins. Þjónustuver Kópavogsbæjar er með óbreyttan opnunartíma, símanúmer er 4410000. Nánar.

Skólar í Kópavogi hafa lagað sig að breyttum aðstæðum. Áhersla er á viðveru yngri árganga en eldri nemendur eru meira í fjarkennslu. Hlé hefur verið gert á öllu starfi íþróttafélaga. Minnt er á að samkvæmt tilmælum Almannavarna eiga skólafélagar sem ekki eru í sama hópi í skólastarfinu ekki að vera í návígi utan skóla. Nánar um skólastarf í Kópavogi í samkomubanni.

Menningarhús í Kópavogi hafa verið lokuð utanaðkomandi síðan 11.mars vegna verkfalls Eflingar. 

Upplýsingavefur um COVID-19.