Okkar Kópavogur fær 400 hugmyndir

02.06.2016
Fyrsta skref er að fá hugmynd. Annað skrefið er að gefa hugmyndinni atkvæði og þriðja skrefið er að…
Fyrsta skref er að fá hugmynd. Annað skrefið er að gefa hugmyndinni atkvæði og þriðja skrefið er að koma hugmyndinni í framkvæmd!

Tæplega 400 hugmyndir bárust í hugmyndasöfnun í verkefninu Okkar Kópavogur en hugmyndasöfnun lauk 31. maí. Hugmyndum var safnað á vef verkefnisins en einnig voru haldnir fimm íbúafundir þar sem þátttakendur lögðu til hugmyndir, ræddu og kynntu og sameinuðust á hverjum fundi að lokum um tíu. Þátttaka í verkefninu hefur verið vonum framar og margar spennandi hugmyndir komnar í pottinn.

Sumar hugmyndir sem sendar voru inn eru góðar og einfaldar i framkvæmd en falla utan skilgreiningar á verkefninu. Ákveðið hefur verið að bregðast við þeim, til dæmis að setja upp hjólaviðgerðastand við áningarstað hjá Kópavogstúni og koma hárþurrkum fyrir í karlaklefum sundlauga í Kópavogi.

Matshópur Kópavogsbæjar mun nú meta hugmyndirnar sem komið var á framfæri út frá fyrirfram gefnum skilyrðum. Hópurinn mun stilla upp allt að 20 hugmyndum í hverju hverfi fyrir kosningar í haust, og verða allt að 10 þeirra af íbúafundunum.

Næsta hlutverk íbúa bæjarins, 16 ára og eldri, er að forgangsraða verkefnum í einu hverfi í haust, út frá fjármagni þess hverfis. Hverfunum er úthlutað fjármagni í takt við íbúafjölda en alls verða 200 milljónir settar í að framkvæma verkefnin. Framkvæmd verkefna hefst á þessu ári og lýkur á því næsta enda verkefnið til tveggja ára.

Þess má geta að hugmyndum sem falla utan ramma verkefnisins Okkar Kópavogur verður haldið til haga. Þær geta nýst í aðra vinnu á vegum Kópavogsbæjar, til dæmis í vinnu hverfisáætlana og samgöngustefnu Kópavogsbæjar.

Nánari upplýsingar um Okkar Kópavogur: www.kopavogur.is/okkarkopavogur

Aftur í yfirlit