Nýtt rit um gamlar herbúðir í Kópavogi

13.06.2013
Kampar í Kópavogi
Kampar í Kópavogi
Í lok maí kom úr prentun rit númer tvö í röð smárita útgefnum af Héraðsskjalasafni Kópavogs og Sögufélagi Kópavogs, Kampar í Kópavogi. Í ritinu er gerð grein fyrir herskálabyggðum breska og bandaríska hersins í núverandi landi Kópavogsbæjar á árum seinni heimsstyrjaldarinnar. Höfundur þess er Friðþór Eydal, fyrrverandi upplýsingafulltrúi varnarliðsins á Keflavíkurflugvelli. 

Meðal herskálabyggða má nefna æfingasvæðið á Sandskeiði, ratsjárstöðina Camp Catherine á Víghól og herskálahvefið Camp Wade á Hörðuvöllum undir Vatnsendahæð þar sem bjuggu á tíma nærri 900 hermenn.

Margir fleiri kampar voru í Kópavogi á hernámsárunum og er gerð grein fyrir tilurð þeirra og tilgangi í ritinu. Fjölmargar ljósmyndir sem flestar hafa ekki birst áður eru í ritinu ásamt kortum sem sýna staðsetningu kampanna.

Smáritið var búið til prentunar af Gunnari Marel Hinrikssyni skjalaverði við Héraðsskjalasafn Kópavogs.

Félagar í Sögufélagi Kópavogs fá ritið sent án endurgjalds en aðrir geta nálgast það í Héraðsskjalasafni Kópavogs á afgreiðslutíma þess. Lausasöluverð er 1.500 kr. Þar er einnig hægt að ganga í Sögufélag Kópavogs.

Aftur í yfirlit