Minningarskjöldur um harmleik við Kópavogslæk

03.03.2014
Minningjarskjöldurinn um systkinin þrjú
Minningjarskjöldurinn um systkinin þrjú

Um 150 manns tóku þátt í minningarathöfn um systkinin frá Hvammkoti sem haldin var við Kópavogslæk um helgina. Tvö systkinanna á unglingsaldri drukknuðu í læknum á leið sinni frá Reykjavík árið 1874. Þriðja systkinið, stúlka, sem var með í för komst af við illan leik. Við athöfnina var afhjúpaður minninarskjöldur um atburðinn.

Athöfnin hófst á því að Frímann Ingi Helgason, stjórnarmaður í Sögufélagi Kópavogs, bauð gesti velkomna. Arnhildur Jónsdóttir leikkona las kvæði Matthíasar Jochumssonar Börnin frá Hvammkoti. Sr. Gunnar Sigurjónsson prestur í Digraneskirkju flutti ávarpsorð og fjallaði um atburðinn.

Minningarskjöldurinn var svo afhjúpaður af þeim  frændsyskinum Árna Sigurðssyni  og Þórunni Önnu Sigurðardóttur, en langamma þeirra Sigríður Elísabet Árnadóttir var sú systkinanna frá Hvammkoti sem komst lífs úr læknum.

Að lokinni afhjúpun skjaldarins var boðið upp á kaffiveitingar í safnaðarheimili Digraneskirkju, þar las sr. Gunnar Sigurjónsson ljóð Þorbjargar Daníelsdóttur 1. maí 1997 og  Ásgeir Jóhannesson las kafla  úr minningargrein Vilmundar Jónssonar landlæknis um Sigríði Elísabetu Árnadóttur.

Minningarskjöldurinn afhjúpaður

Aftur í yfirlit