Hlupu í minningu leikskólastjóra

27.06.2014
Krakkar á leikskólanum Urðarhóli að loknu hlaupi 2014.
Krakkar á leikskólanum Urðarhóli að loknu hlaupi 2014.
Heilsuleikskólinn Urðarhóll hélt árlegt Urðarhólshlaup á Rútstúni í vikunni.  Hlaupið er haldið í minningu Unnar Stefánsdóttur sem er höfundur Heilsustefnunnar og fyrrum leikskólastjóri leikskólans. Unnur sem var mikill hlaupari lést árið 2011. Það ár var fyrsta Urðarhólshlaupið haldið.

Markmið Heilsuleikskólans Urðarhóls er að auka gleði og vellíðan barnanna með áherslu á næringu, hreyfingu og sköpun. 

Hlaupið fór fram miðvikudaginn 25. júní. Í ár var í fyrsta skipti hlaupið í fimm hópum, börn fædd 2008, 2009, 2010, 2011 og svo kennarar. Mikil gleði og eftirvænting var hjá öllum hópum og kláruðu allir hlaupið með glæsibrag.  Í lokin var brekkusöngur þar sem Unnar Stefánsdóttur var minnst og lagið Öxar við ánna var sungið.

"Við í Urðarhóli viljum hvetja alla til að huga að heilsunni . Hvetjum foreldra til að hreyfa sig með börnum sínum, það  eflir tilfinningartengsl  fjölskyldunnar og er grunnur að góðri geðheilsu," segir Sigrún Hulda Jónsdóttir leikskólastjóri.

Aftur í yfirlit