Traustur rekstur í erfiðu efnahagsumhverfi

Ársreikningur Kópavogsbæjar fyrir árið 2022 endurspeglar traustan rekstur þrátt fyrir erfið skilyrði í efnahagsumhverfinu. Þá lækkar skuldaviðmið sveitarfélagsins í 95% og er langt undir lögbundnu lágmarki sem er 150% samkvæmt sveitastjórnarlögum.

„Rekstrarniðurstöður ársins endurspegla ríka áherslu meirihluta Sjálfstæðisflokksins og Framsóknarflokksins á góðan rekstur. Afgangur er á rekstri bæjarins fyrir fjármagnsliði og veltufé frá rekstri um þrír milljarðar króna. Erfitt efnahagsumhverfi hefur þó áhrif á heildarniðurstöðu ársins en mikil verðbólga og hækkandi vextir leiða beint til mikillar hækkunar á fjármagnsliðum. Áskoranir eru fram undan í rekstri sveitarfélaga og verðhækkanir í samfélaginu munu áfram hafa bein áhrif á rekstur bæjarins. Þá hafa skuldbindingar Kópavogs í málefnum fatlaðs fólks aukist verulega en þar hefur ríkið ekki veitt fjármagni til málaflokksins í samræmi við lögbundin verkefni. Á árinu 2022 er áætlað að halli Kópavogsbæjar vegna málefna fatlaðs fólks sé um 1,4 milljarðar vegna vanfjármögnunar ríkisins. Verkefnið nú er að standa vörð um traustan rekstur, forgangsraða fjármunum og hagræða í rekstri þannig að áfram sé unnt að veita góða þjónustu en stilla álögum á bæjarbúa og fyrirtæki í hóf,“ segir Ásdís Kristjánsdóttir, bæjarstjóri Kópavogs.

Ársreikningurinn var lagður fram í bæjarráði Kópavogs þriðjudaginn 18.apríl og vísað til fyrri umræðu í bæjarstjórn Kópavogs.

Rekstrartekjur námu um 45,5 milljörðum króna fyrir A- og B-hluta, en gert hafði verið ráð fyrir 43,6 milljörðum króna. Rekstratekjur A-hluta námu 43,3 milljörðum króna. Rekstrarniðurstaða fyrir fjármagnsliði er jákvæð um 1,3 milljarða fyrir A- og B- hluta, en þegar fjármagnsliðir koma inn, þá verður afkoman neikvæð um 2,1 milljarð. Hækkun fjármagnsgjalda má fyrst og fremst rekja til neikvæðrar verðlags- og vaxtaþróunar miðað við upphaflegar forsendur en samkvæmt fjárhagsáætlun með viðaukum var gert ráð fyrir 53 milljóna tapi. Framlegð er um 10% en með framlegð er átt við það sem eftir stendur þegar breytilegur rekstrarkostnaður hefur verið dreginn frá tekjum. Breytilegur kostnaður er sá kostnaður sem breytist með breyttu magni á vöru eða þjónustu.

Eigið fé samkvæmt samanteknum efnahagsreikningi A og B hluta eru 35,8 milljarðar króna en eigið fé A hluta nam 18,6 milljörðum króna.

Veltufé frá rekstri A og B hluta er 3,2 milljarðar. Veltufé frá rekstri sýnir hvað rekstur gefur af sér til að standa undir framkvæmdum og afborgunum lána.

Í A hluta eru sjóðir og stofnanir sem eru fjármagnaðar af skatttekjum en undir B hluta falla stofnanir fyrirtæki og rekstrareiningar sem eru reiknar sem fjárhagslega sjálfstæðar einingar. Þess má geta að byggðasamlög og önnur samrekstrarfélög eru undir A-hluta.

Skuldaviðmið lækkar

Skuldaviðmið A- og B- hluta lækkar frá fyrra ári og er 95%, var 96% í árslok 2021. Skuldaviðmið A-hluta var 86%.

Vaxtaberandi skuldir í ársreikningi fyrir 2022 eru 33,8 milljarðar. Heildarskuldir og skuldbindingar Kópavogsbæjar hækkuðu um 4.425 króna eða 8,8%. Skuldir lækka ef tekið er tillit til verðbólgu, en vísitala til verðtryggingar hækkaði um 9,3% á árinu.

Megin skýring á hækkun skulda eru, auk verðbóta á verðtryggð lán, hækkun lífeyrisskuldbindingar og uppfærsla á skuldbindingum vegna Vatnsendamáls og kaupa bæjarins á landi ríkisins í Vatnsendahvarfi.

Umfangsmiklar fjárfestingar

Fjárfestingar og framkvæmdir í eignum bæjarins námu 4,7 milljörðum króna. Helstu framkvæmdir eru nýbygging Kársnesskóla við Skólagerði, en einnig voru viðamiklar framkvæmdir í ýmsum skólum og leikskólum, til dæmi leikskólanum Efstahjalla og Furugrund, íþróttahúsinu Digranesi, Kópavogsskóla, breytingar á Kórnum vegna Hörðuvallaskóla og og framlag vegna tækjakaupa á skíðasvæðunum auk ýmissa framkvæmda sem tengjast stofnunum bæjarins og gatnagerð.

Laun og launatengd gjöld

Laun og launartengd gjöld A og B hluta námu alls 23,7 milljörðum króna. Fjöldi á launaská í árslok voru 3.123 manns en meðal stöðugildi á árinu voru 2.053.

Íbúar Kópavogs voru 39.793 þann 1.desember 2022 og fjölgaði þeim um 806 frá fyrra ári.

Ársreikningur 2022 - fyrri umræða