Vel heppnaðir Óperudagar

Tilgangur hátíðarinnar var að breyta bænum í óperu- og leiksvið og gefa flytjendum og gestum færi á að eiga í fjörugu samtali við óperuformið. Um 70 ungir söngvarar og aðrir tónlistar- og listamenn tóku þátt í hátíðinni. 

Dagskráin var mjög fjölbreytt og viðburðir alls 35. Má nefna óperugöngur í hjarta bæjarins með óvæntum uppákomum fyrir börn og fullorðna, nýja fótboltaóperu í tilefni EM í fótbolta, hádegistónleika í Salnum, stuttar óperuuppfærslur, masterklass með Kristni Sigmundssyni, stofutónleika og kabarettkvöld svo fátt eitt sé nefnt. Einstök atriði úr Óperudögum í Kópavogi voru einnig flutt í skólum og í félagsmiðstöðvum eldri borgara.

Listrænn stjórnandi hátíðarinnar var Guja Sandholt en framkvæmdastjórn var í höndum Örnu Schram, forstöðumanns Menningarhúsa Kópavogsbæjar. Fjöldi annarra starfsmanna menningarhúsa bæjarins, kom einnig að hátíðinni sem naut jafnframt liðsinnis starfsnáms Menningarstjórnunar Háskólans á Bifröst.

Arna Schram, forstöðumaður Menningarhúsa Kópavogsbæjar, segir að hátíðin sé sú fyrsta sinnar tegundar á Íslandi: „Hátíðin hitti í mark, aðsókn að viðburðum var mikil og hátíðin vakti mikinn áhuga fjölmiðla. Með óperuhátíðinni náðum við að sameina marga þætti í  nýrri menningarstefnu Kópavogsbæjar, svo sem að tengjast betur upprennandi listamönnum, ná til barna og eldri borgara í Kópavogi, efla sérstöðu menningarstarfs bæjarins, auka samstarf menningarhúsa, skipuleggja nýja þemahátíð og síðast en ekki síst að efla ímynd bæjarins sem miðstöð menningar í ólíku formi.“

Guja Sandholt: „Mér þótti hátíðin takast einstaklega vel og augljóst að bæjarbúar og aðrir gestir tóku mjög vel í framtakið enda fór mæting fram úr björtustu vonum. Ég er þakklát lista- og menningarráði fyrir dyggan stuðning, starfsfólki Kópavogsbæjar fyrir skemmtilega samvinnu, hinu fjölmarga listafólki sem kom fram og öllum öðrum sem lögðu hönd á plóginn.“

Lista- og menningarráð Kópavogs studdi hátíðina með framlagi úr lista- og menningarsjóði bæjarins en einnig fékk hún styrki frá einstökum fyrirtækjum og einstaklingum m.a.  í gegnum Karolina Fund.