Torfi Tómasson sigraði í söngkeppni félagsmiðstöðva

31.01.2013
Torfi Tómasson ásamt bæjarstjóra, Ármanni Kr. Ólafssyni. Ljósmynd/Þórdís Björt Sigþórsdóttir
Torfi Tómasson ásamt bæjarstjóra, Ármanni Kr. Ólafssyni. Ljósmynd/Þórdís Björt Sigþórsdóttir

Torfi Tómasson, frá félagsmiðstöðinni Fönix í Salaskóla, kom sá og sigraði í söngkeppni félagsmiðstöðva í Kópavogi sem fram fór í Salnum fyrir fullu húsi í gærkvöld. Níu atriði kepptu til úrslita um þrjú þátttökusæti á söngkeppni Samfés sem fram fer í Laugardalshöll laugardaginn 2. mars nk.

Torfi flutti frumsamið lag God´s planet of fools og spilaði undir á rafmagnsgítar.

Í öðru sæti urðu Natalía Blær Jóhannsdóttir og Eva Rún frá félagsmiðstöðinni Kúlunni í Hörðuvallaskóla og í þriðja  sæti fulltrúar félagsmiðstöðvarinnar Dimmu í Vatnsendaskóla, Arnar Freyr Ingason, Gabríel Örn Ólafsson, Dagur Þórarinsson og Ásþór Bjarni Guðmundsson.

Dómarar í keppninni voru Regína Ósk, Jogvan Hansen, Greta Mjöll Samúelsdóttir, Elísabet Ormslev og Ingunn Hlíf Friðriksdóttir.

Atriði kvöldsins voru hvert öðru betra og það var samdóma álit dómara keppninnar að valið var ekki vandalaust.

Aftur í yfirlit