Sýning um Sveinbjörn flutt norður á land

Tónlistarsafn Íslands er rekið af Kópavogsbæ. Kveikjan að sýningunni er sú að Tónlistarsafni Íslands hafði borist fjöldi muna frá Eleanor Oltean, barnabarni Sveinbjörns í Kanada, sem aldrei fyrr hafa komið almenningi fyrir sjónir.

Meðal merkra muna á sýningunni er handrit að verkinu Polonaise frá árinu 1926. Það var samið fyrir hljómsveit og gerði Sveinbjörn sér vonir um að það yrði flutt á alþingishátíðinni árið 1930. Handritið hefur verið týnt um árabil en kom í ljós fyrir skömmu.

Sveinbjörn flutti ungur að árum frá Íslandi og starfaði lengst af í Edinborg í Skotlandi við tónlistarkennslu og tónsmíðar. Síðar fluttu börnin hans tvö til Kanada og fylgdi hann og eiginkona hans, Eleanor Sveinbjörnsson, á eftir og bjuggu þau þar í nokkur ár.

Ef frá er talinn þjóðsöngurinn eru aðeins fáein sönglaga hans kunn hér á landi.

Sýningarstjóri og hönnuður er Guðrún Helga Stefánsdóttir, meistaranemi í menningarstjórnun við Háskólann á Bifröst. Sýningin er hluti af lokaverkefni hennar við skólann.

Fræðilegur ráðgjafi er Guðbrandur Benediktsson sagnfræðingur og listrænn ráðgjafi er Anna Þóra Karlsdóttir myndlistarkona.