Söfn og sund á Vetrarhátíð í Kópavogi

Fjölbreytt dagskrá á safnanótt

Gerðarsafn, Salurinn, Bókasafn Kópavogs, Náttúrufræðistofa Kópavogs, Molinn og Héraðsskjalasafnið bjóða gesti og gangandi velkomna, ókeypið er inn og nóg af bílastæðum.

Meðal þess sem boðið er upp á er leiðsögn listamannanna Katrínar Elvarsdóttur og Ingvars Högna Ragnarssonar um sýningu sína í Gerðarsafni og leiðsögn um listaverkageymslu safnsins. Einar einstaki töframaður og Sirrí spá verða í Bókasafninu og margvíslegur fróðleikur í  Náttúrufræðistofunni og Héraðskjalasafni Kópavogs. Í Molanum verða gestir teknir inn í menningarheim unga fólksins, þar spilar Local Kópavogs Jazzband og leikverkið „I thought it was brilliant. A fantastic performance!“ -Henrik Vibskov“ verður flutt svo dæmi séu tekin.  Í anddyri Salarins verða sýndar upptökur frá tónleikum í gegnum tíðina. Þá verður nýja kaffihúsið í Gerðarsafni, Garðskálinn, opið og boðið upp á sælkerastund þar sem fágætir ostar og gæðabjór eru í forgrunni auk hefðbundnari kaffiveitinga.

„Það myndast einstök stemning hjá okkur í menningarhúsunum á Safnanótt, hér eru mörg söfn, spennandi dagskrá og gott aðgengi. Við bjóðum Kópavogsbúa og alla gesti safnanætur hjartanlega velkomna hingað,“ segir Arna Schram forstöðumaður Listhúss Kópavogs.

Flott atriði og frítt í sund á sundlauganótt

Sundlauganótt var haldin í fyrsta sinn í fyrra í Sundlaug Kópavogs, en nú tekur Salalaug einnig þátt. Sundlauganótt hefst klukkan 16 og er opið til miðnættis. Frítt er í sundlaugarnar. Í Sundlaug Kópavogs er boðið upp á Zumba og tónleika með Ragnheiði Gröndal að þeim loknum. Í Salalaug verður jóga í vatni, dj og boðið upp á flot.

Safna- og sundlauganótt eru hluti af Vetrarhátíð sem fram fer á öllu höfuðborgarsvæðinu. Hátíðinni lýkur á sunnudag með fjölskyldudegi í Bláfjöllum og verður þá frítt í fjöllinn fyrir börn yngri en 15 ára.

Dagskrá Vetrarahátíðar í Kópavogi

Dagskrá Vetrarhátíðar á öllu höfuðborgarsvæðinu