Lokahátíð Skapandi sumarstarfa vel sótt

Lokahátíð Skapandi sumarstarfa var haldin í Molanum ungmennahúsi við Hábraut 2 en þar deilir listafólk afrakstri sumarsins fyrir gesti og gangandi, áhugasama og forvitna sem langar að kynna sér það athyglisverðasta í íslensku grasrótinni. 

Dagskrá hátíðarinnar stóð yfir frá 17 til 20 fimmtudag 22. júlí og var húsið stútfullt af áhugasömum listunnendum allan tímann. Vel var gætt að sóttvörnum vegna kunnugra aðstæðna í samfélaginu. Atriðunum var dreift á milli hæða svo allir kæmust fyrir enda margir forvitnir um starfið. Listin teygði sig alla leið niður í bílakjallara hússins þar sem plötusnúður þeytti skífum og skart og skúlptúrar voru til sýnis. 

Lokahátíðin í ár var umfangsmikil en sýnd voru 20 verkefni á hátíðinni sem að baki stóðu 29 listamenn. Listaverkin voru jafn ólík og þau voru mörg en meðal þeirra voru barnatónbókverk um snigla, stuttmynd um sérfræðinga, skúlptúrar gæddum sveppum, smásögur, ljóðabækur og margt fleira. 

Gestir og gangandi voru hæstánægðir með viðburðinn enda tryggði fjöldi og fjölbreytileiki listamanna að allir gætu fundið eitthvað að þeirra skapi. Skapandi sumarstörf í Kópavogi veita ungu listafólki á aldrinum 18-25 ára einstakt tækifæri til að vinna að eigin listsköpun og hefur það reynst mikilvægur stökkpallur fyrir margt af efnilegasta listafólki landsins.