Líf og fjör á Hálsatorgi í sumar

02.07.2013
Líf og fjör á Hálsatorgi
Líf og fjör á Hálsatorgi

Líf og fjör var á Hálsatorgi í Kópavogi í morgun þegar sumarstarfsmenn Molans, í Skapandi sumarstörfum, ungmennahúss bæjarins, skemmtu leikskólabörnum, með leik og dansi en markmiðið er að lífga upp á torgið yfir sumartímann.  Dagskráin í morgun var fyrsta skrefið í þeirri viðleitni Kópavogsbæjar.

Sett hafa verið upp trjábeð og blóm á torginu til að skapa þar skjól og hlýlegra umhverfi.

Torgið er á Kópavogshálsinum á milli Íslandsbanka, heilsugæslunnar í Hamraborg og Bókasafns Kópavogs. Þaðan er stutt í veitingastaði og verslanir í Hamraborginni og á menningartorfuna.

Eftir skemmtidagskrána á torginu var gengið yfir í Bókasafn Kópavogs þar sem leikskólabörnin fengu skapandi fræðslu með tónlist og upplestri.

Stefnt er að því að fleiri slíkar uppákomur verði á Hálsatorgi í sumar og hefur ungt skapandi fólk í Skapandi sumarstörfum m.a. boðað komu sína þangað 18. júlí. Allir eru velkomnir.

Bæjarbúar eru hvattir til að nýta sér torgið í meira mæli á góðviðrisdögum og setjast þar jafnvel niður með nesti og njóta lífsins.

Aftur í yfirlit