Justin Timberlake í Kórnum

Justin Timberlake verður með tónleika í Kórnum í Kópavogi 24. ágúst nk. Tónleikahaldarar leigja Kórinn af Kópavogsbæ og hafa starfsmenn bæjarins komið að undirbúningnum m.a. til að tryggja öryggi húsnæðis og umferðar á tónleikadegi. Kórinn var byggður af Kópavogsbæ og tekinn í notkun árið 2007 sem fjölnota hús fyrir íþróttir, ráðstefnur og tónleika. 

Kórinn er stærsta mannvirki sinnar tegundar hér á landi. Ekkert annað hús á Íslandi getur tekið á móti fleiri tónleikagestum, eða hátt í nítján þúsund manns.

 

Rík áhersla er lögð á að sem minnst truflun hljótist af tónleikunum fyrir íbúa Kórahverfis sem og að aðgengi fyrir tónleikagesti verði gott. Íbúar geta búast við nokkurri umferð 24. ágúst, sérstaklega frá kl. 16:00 til 23:00. Umferð verður stjórnað af lögreglu og bæjaryfirvöldum.  

 

Sérstök biðstöð verður fyrir leigubíla alveg við Kórinn en fólk er hvatt til að nýta sér almenningsvagna og leigubíla til og frá tónleikastað.