Sjálfbærniskýrsla 2023

Kæru Kópavogsbúar,

Sjálfbærniskýrsla Kópavogs sem nú er gefin út í þriðja sinn endurspeglar vel að sjálfbærni er leiðarljós í starfsemi bæjarins. Verkefnin sem stuðla að sjálfbærni eru fjölbreytt í Kópavogi og eru í takt við innleiðingu Kópavogsbæjar á Heimsmarkmiðum Sameinuðu þjóðanna um sjálfbæra þróun.

Á síðasta ári var unnið að viðamiklum verkefnum sem greint er frá í Sjálfbærniskýrslunni. Hér má nefna nokkur dæmi. Lokið var við skipulagsvinnu á nýju hverfi, Vatnsendahvarfi, en þar er áformað að rísi byggð með um 500 íbúðum. Gróður og náttúra munu fléttast inn í hverfið og í anda sjálfbærni verður áhersla á góðar samgöngutengingar.

Starfsumhverfi leikskólanna var tekið til gagngerrar endurskoðunar með farsæld barna að leiðarljósi. Meðal þess sem var innleitt var gjaldfrjáls leikskóli í sex tíma. 40% af foreldrum og forráðafólki barna nýttu sér sveigjanleika í skráningu dvalartíma og styttu dvalartíma barna með þeim jákvæðu afleiðingum að mönnun gekk miklu betur en undanfarin ár og leikskólar þurftu ekki að grípa til lokana.

Áfram var stutt við heilsueflingu eldri borgara í gegnum verkefnið Virkni og vellíðan sem hefur eflst ár frá ári og nú bæði í íþróttahúsum bæjarins og félagsmiðstöðvum aldraðra. Markmiðið er að stuðla að bættri líkamlegri, andlegri og félagslegri heilsu íbúa og stuðla að farsælli öldrun sem er gríðarlega mikilvægt velferðarmál.

Kópavogsbær er fallegur bær og við höfum lagt metnað í snyrtileg og gróðursæl opin svæði. Íbúar kunna vel að meta þessi svæði eins og íbúasamráð um Kópavogsdal sýndi, áhuginn var gríðarlega mikill og góð þátttaka frá íbúum sem vilja hag dalsins sem bestan.

Að lokum er vert að geta þess að sú áhersla sem lögð er á traustan og góðan rekstur hjá Kópavogsbæ gerir okkur kleift að veita sveigjanlega og góða þjónustu sem mætir þörfum íbúa.

Ásdís Kristjánsdóttir, bæjarstjóri í Kópavogi

Sjálfbærniskýrsla Kópavogsbæjar er gefin út einu sinni á ári samhliða ársreikningi. Skýrsla fyrir árið 2023 er gefin út samkvæmt viðmiðum Global Reporting Initiative, GRI staðla með tilvísun, (e. *GRI Standards, content index with reference). Einnig verður leitast við að birta þær mælingar utan staðalsins sem þegar eru til staðar hjá sveitarfélaginu.

GRI tilvísunartaflan sem fylgir skýrslunni skýrir að hve miklu leyti gert er grein fyrir hverju viðmiði í skýrslunni. Sum viðmiðanna fá ítarlega umfjöllun á meðan gert er grein fyrir öðrum í tilvísunartöflunni. Horft var til heildarstefnu Kópavogsbæjar og innleiðingar hennar sem felur í sér vinnu með Heimsmarkmið Sameinuðu þjóðanna um sjálfbæra þróun. GRI vísarnir, sem hafa hingað til verið notaðir fyrir fyrirtæki, duga ekki einir og sér til þess að ná utanum margbreytileika samfélags Kópavogsbæjar með alla sína íbúa, fyrirtæki og stofnanir og þess vegna eru einnig að finna í skýrslunni ýmsar aðrar upplýsingar um samfélagið.

Kópavogsbær safnar og vinnur umfangsmikil gögn í upplýsingakerfum sínum um samfélagið og starfsemi sveitarfélagsins. Einnig hafa verið þróuð sérstök upplýsingakerfi, svo sem Nightingale, til þess að halda utan um mælingar, mælaborð og vísitölur sveitarfélagsins. Vísað verður í þær upplýsingar og er skýrslunni ætlað að gefa innsýn í þau fjölmörgu verkefni sem unnin hafa verið á vegum sveitarfélagsins á síðastliðnu ári. Þær upplýsingar sem birtast í skýrslunni koma meðal annars úr Heimsmarkmiðavísitölu Kópavogsbæjar, umhverfisumsjónarkerfi Klappa, starfsemismælingum og þjónustukönnunum.

Starfsfólk sviða sveitarfélagsins kom að ritun skýrslunnar og yfirlestri hennar. Helstu tengiliðir vegna upplýsinga er varða skýrsluna og efni hennar eru Pálmi Þór Másson, sviðsstjóri stjórnsýslusviðs, Kristín Egilsdóttir, sviðstjóri fjármálasviðs, Auður Finnbogadóttir, stefnustjóri, Sigríður Björg Tómasdóttir, almannatengill og Jakob Sindri Þórsson, sérfræðingur hjá Kópavogsbæ. Leiðsögn og gæðatrygging skýrslunnar var í höndum Evu Magnúsdóttur, Podium ehf. Endanleg ábyrgð á birtingu skýrslunnar liggur hjá bæjarstjórn Kópavogs.