Einar Örn Þorvarðarson
BF Viðreisn
Einar er fyrrum framkvæmdastjóri HSÍ en hann gegndi því starfi í 16 ár. Hann stundaði nám í húsasmíði við Iðnskólann í Reykjavík þar til hann fór til Spánar 1985 og lék sem atvinnumaður í handbolta. Einar er einn af stofnendum HK og spilaði með félaginu alla yngri flokka og fjögur ár í meistaraflokki. Einar lék sem markvörður og á 227 landsleiki fyrir Ísland. Eftir að hann lagði skóna á hilluna þjálfaði hann meistaraflokka Selfoss, Aftureldingu og Hauka ásamt því að starfa 8 ár sem aðstoðarþjálfari karlalandsliðsins í handbolta.
Einar hefur markvisst í sínu starfi sem framkvæmdastjóri og sem þjálfari unnið að uppbyggingu afreksstefnu í íþróttamálum og náð mjög góðum árangri á heimsvísu með þátttöku íslenskra landsliða í Ólympíuleikum, Heimsmeistara og Evrópumeistaramótum í Handknattleik. Hann hefur jafnframt tekið virkan þátt í starfi Evrópska handknattleikssambandsins.
Einar er fjölskyldumaður, giftur Rúnu Kristinsdóttur. Þau eru búsett í Kópavogi eiga 3 uppkomin börn Margréti, Þorvarð og Finnboga og 2 barnabörn sem búa ásamt foreldrum sínum í Noregi. Einar er mikill íþrótta- og útivistamaður.
